Бортправаднікі змянілі форменную вопратку на спартовы касцюм

Бортправаднікі «Белавія» перапрануцца ў адмысловую форму, каб сустрэць гасцей і ўдзельнікаў II Еўрапейскіх гульняў, якія прыляцяць у Мінск 19 чэрвеня рэйсамі з Лондана, Парыжа і Рыма. Праект рэалізаваны выключна пры падтрымцы айчынных вытворцаў: дызайн формы распрацаваны ўласнымі сіламі каманды Mark Formelle - аднаго з самых вядомых беларускіх брэндаў адзення, а модны абутак бортправаднікоў прадаставіла фабрыка «Лідскі абутак» - мадэль распрацавана на аснове папулярнай калекцыі спартыўнага абутку з дзвюма палоскамі па баках.

На рэйсах авіякампаніі «Белавія» будзе перавезена больш за 2500 удзельнікаў і заўзятараў II Еўрапейскіх гульняў, і каб госці краіны змаглі акунуцца ў атмасферу свята і гасціннасці ўжо на борце самалёта, быў распрацаваны праект формы экіпажаў з адмысловым прынтам, які акцэнтуе геаграфічнае становішча Рэспублікі Беларусь. А з адмыслова распрацаваных брашур пасажыры шмат што пазнаюць пра нашу краіну.

    «Наша авіякампанія не магла застацца ўбаку ад падзеі сусветнага маштабу, і мы вырашылі з дапамогай гэтага праекта задаць настрой спартоўцам, членам зборных, заўзятарам, а таксама іншым удзельнікам Еўрапейскіх гульняў ўжо з першых хвілін падарожжа ў Беларусь. Спадзяемся, што гэты праект дапаможа нашым гасцям прасякнуцца атмасферай усеагульнага спартовага свята, якім наступныя некалькі дзён будзе жыць наша краіна!», - сказаў генеральны дырэктар ААТ«Авіякампанія «Белавія» Анатоль Гусараў.

У цэлым на праект - ад распрацоўкі канцэпцыі да атрымання узораў - пайшло менш за 4 тыдні. Па спецзаказе было выраблена 9 мужчынскіх і 9 жаночых касцюмаў. У продажы ў абмежаванай колькасці можна будзе набыць адмыслова распрацаваныя цішоткі з дызайнам, які адказвае на пытанне «Дзе знаходзіцца Беларусь».

    «Мы рады такому супрацоўніцтву з «Белавія», бо падобныя праекты маюць важны сацыяльны складнік. Мы расказваем пра нашу краіну, яе таварыскасць, адкрытасць і гатоўнасць сустрэць дарагіх гасцей з іншых краін. Таксама мы самі робімся больш дасведчанымі і прафесійнымі, што станоўча адбіваецца і на іншых нашых праектах і калекцыях», - падкрэсліла суўласнік Mark Formelle Святлана Сіпарава.

Бортправаднікі «Белавія» ўзялі ўдзел у фотасесіі, якая дэманструе, што цудоўнае падарожжа ў нашу краіну пачынаецца з першага кроку ў салон самалёта. За фразай «Мы рады вітаць вас на борце «Белавія» чуецца: «Сардэчна запрашаем на борт Беларусь - гэты візіт будзе для вас незабыўным. У нас выдатна!»