"Белавія" адкрыла новы напрамак у маршрутнай сетцы

Сёння авіякампанія "Белавія" пачынае рэгулярныя рэйсы па маршруце Мінск-Дубай-Мінск. Цяпер паляцець у Дубай можна два разы на тыдзень з вылетам з Мінска ў 19.50 (па аўторках) і ў 16.15 (па пятніцах). Зваротны рэйс з Міжнароднага аэрапорта Дубай будзе ажыццяўляцца ў 03.30 (па серадах) і ў 23.55 (па пятніцах). Час для ўсіх аэрапортаў названы мясцовы.

Кошт авіябілетаў пачынаецца ад 216 еўра ў адзін бок (тарыф LIGHT – без багажу) і ад 375 еўра туды-назад (тарыф LIGHT – без багажу). Больш падрабязна з раскладам і тарыфамі можна азнаёміцца на сайце belavia.by.

Палёты плануецца ажыццяўляць на авіялайнеры новага пакалення Embraer 195-Е2 пасажыраёмістасцю 125 месцаў: 9 месцаў у салоне бізнес-класа і 116 - у эканом-класе. У сувязі з высокай загрузкай першага рэйса тып паветранага судна быў заменены на больш ёмісты самалёт Boeing 737-800, разлічаны на 189 пасажыраў і здольны забяспечыць максімальны камфорт падчас доўгага палёту. Рэйс Мінск-Дубай стане самым працяглым напрамкам з усёй сеткі рэгулярных маршрутаў "Белавія". Час у шляху складае каля 6 гадзін.

"Авіякампанія ўскладае вялікія надзеі на 2021 год. Мы не толькі паступова аднаўляем палёты па ўжо звыклых для пасажыраў рэгулярных напрамках, але і адкрываем новыя. У 2020 годзе, нягледзячы на ўсе цяжкасці, мы пачалі рэгулярныя рэйсы ў Вену і Ташкент, а сёння выконваем першы палёт па новым рэгулярным кірунку ў Дубай. Мы заўважылі запатрабаванасць дадзенага маршруту ў турыстычных аператараў і пасажыраў і працавалі над яго адкрыццём. Дадатковым стымулам да прыняцця рашэння пра адкрыццё новага рэгулярнага рэйса стала магчымасць для грамадзян Беларусі і ААЭ лятаць з адной краіны ў другую без віз - гэта значна спрашчае падарожжа і робіць яго больш прывабным. Папулярнасць новага маршруту ў пасажыраў пацвярджае амаль 100 % загрузка першага рэйса Мінск-Дубай, а таксама тое, што на першай у 2021 годзе маштабнай акцыі авіякампаніі, праведзенай 16 лютага, было выкуплена 100 % авіябілетаў. Мы спадзяёмся, што прамыя рэйсы паміж Мінскам і Дубаем будуць спрыяць развіццю ўязнога турызму і збліжэнню нашых культур", - адзначыў Ігар Чаргінец, генеральны дырэктар авіякампаніі "Белавія".

З 16 студзеня 2021 года грамадзяне Беларусі могуць уязджаць, выязджаць і падарожнічаць транзітам праз тэрыторыю Аб’яднаных Арабскіх Эміратаў, а таксама знаходзіцца на тэрыторыі ААЭ без віз (не больш за 90 дзён з даты прылёту). Такія ж умовы дзейнічаюць і для грамадзян ААЭ на тэрыторыі Беларусі.

Звяртаем вашую ўвагу на тое, што ў ААЭ дзейнічаюць абмежаванні на ўезд. Рэкамендуем пры куплі авіябілета азнаёміцца з правіламі ўезду ў краіну.