Белавія адкрывае прамы рэйс з Мінска ва Уфу

З 31 траўня “Белавія” пачне выконваць прамыя рэйсы ў яшчэ адзін расійскі горад - Уфу. Раней у гэтым месяцы авіякампанія ўжо запусціла палёты ў Екацярынбург і Самару. Уфа на дадзены момант стане дзясятым рэгулярным маршрутам “Белавія” ў Расію.

“Белавія” будзе лятаць па маршруце Мінск-Уфа-Мінск адзін раз на тыдзень - па панядзелках. Вылет з Нацыянальнага аэрапорта Мінск прызначаны на 00.10, прыбыццё ў Міжнародны аэрапорт Уфа - у 04.55. Зваротны рэйс плануецца ў 06.20 з прылётам у Мінск у 07.05. Час для ўсіх аэрапортаў названы мясцовы.

“Расійскія маршруты заўсёды карысталіся вялікай папулярнасцю ў беларусаў і транзітных пасажыраў. Таму аднаўляць і пашыраць нашую карту палётаў у гэтым напрамку - адна з прыярытэтных задач цяпер. Мы рады, што ёсць хоць нейкі прагрэс: у пачатку траўня “Белавія” ўжо запусціла два рэйсы ў Расію - у Екацярынбург і Самару. Цяпер вось - Мінск-Уфа-Мінск. Спадзяёмся, што ў хуткім часе мы парадуем вас іншымі добрымі навінамі. Пандэмія ўсё яшчэ не пакінула нас, але свет вучыцца зноўку будаваць камунікацыю. І, здаецца, гэта атрымліваецца”, - пракаментаваў Ігар Чаргінец, генеральны дырэктар авіякампаніі “Белавія”.

Дарога ў адзін бок зойме 2 гадзіны 45 хвілін. Кошт аднаго білета пачынаецца ад 98 еўра па мінімальным тарыфе без багажу (LIGHT), у абодва бакі - ад 183 еўра. Падрабязную інфармацыю пра іншыя тарыфы і дакладны расклад можна знайсці на сайце авіякампаніі belavia.by.

Уфа - сталіца Рэспублікі Башкартастан. Кірунак, які будзе цікавы знатакам народных культур і традыцый. Гэта адзіны горад у свеце, назва якога супадае з прынятым трохлітарным пазначэннем аэрапорта - UFA. Міжнародны аэрапорт “Уфа” знаходзіцца ў 25 кіламетрах ад цэнтра горада.